Catalunyan 2014ko azaroaren 9ko egun historikoak sortu dituen oihartzunak entzuten segitzen dugun une honetan, Euzko Gaztedik catalunyar herria zoriondu eta goraipatu nahi du, aurreko igandean boterearen mehatxua eta xantaia alde batera utzi eta arrakasta paregabe eta ukaezinarekin amaitu den prozesuan parte hartu zuelako. Hau ez da guk egiten dugun balorazio hutsa, nazioarteko erkidegoak modu berean jaso duelako. Hilabete eskasean, Europar Batasunak bi prozesu politiko kontrajarri bizi izan ditu bere baitan: alde batetik, Eskoziako erreferenduma, ariketa aske eta demokratikoa, eskoziarrek independentziari eman dioten "ezetz" estu baina zilegiarekin amaitu dena; eta, bestetik, Catalunyako kontsulta, azkenean egitea lortu dena, Espainiar estatuaren makineriak politika, lege eta hedabideen aldetik eragozpen eta oztopo amaigabeak jarri dizkion arren. Hala eta guztiz ere, oztopoak oztopo, 2,2 milioi catalunyarrek igandean beren botoa hautestontzian sartu zuten. Isilarazteko egin diren saiakera guztien gainetik, catalunyar herriak A-9an hitz egin zuen eta Catalunyako etorkizunerako gehiengo zabalak nahi duen desioa adierazi zuen: Estatu propio eta independentea. Ezerk edo inork ez du catalunyarrak isilaraztea lortu

Euzko Gaztediren aburuz 2.2 milioi pertsonek  behar besteko jendetza  egiten dute Espainiar estatuak ukapena argudio politiko bakartzat erabiltzeari uko egin diezaion eta elkarrizketatik sortu eta akordioarekin amaituko den konpromiso demokratikoa behingoz onar dezan. Espainian, Catalunyan, Euskadin, zabal zabalik ireki behar dira demokraziaren eta adierazpen askatasunaren ateak. Atzean utzi behar dira botere zentralak horren gustuko dituen bide judiziala eta fiskalen aurrean errekurtsoak aurkeztea, denborak hala erakutsi duelako, bilatzen zen kontrako eragina izan duela: gaur, catalunyar gizartea espainiar gizartearengandik banatzen duen arrakala atzo baino zabalagoa da, baina bihar baino txikiagoa izateko bidea hartu du. Ezinbestekoa da hiritarrei ahotsa ematea, eta ahots hori entzutea. Premiazkoa da herriaren borondatea onartzea, jendearen beharren alde borrokatzea. Politika gizatiar eta hurbila egiteko momentua dugu, akordio batera heltzekoa. Ordua, azken finean, Espainiar Gobernuak euskal eta catalunyar nazioek berezko duten erabaki eskubideari legezko bidea eman diezaion. Bada ordua, Madrilek  onar dezan euskal eta catalunyar hiritarrok  gure  etorkizuneko estatus politikoa Europar Batasunaren baitan diseinatu nahi dugula.

Euzko Gaztediren aldetik, Espainiar gobernuari eskatzen diogu  eredugarri jo dezala  XXI. mendeko Europan nagusitu dena. Begiak ireki besterik ez du egin behar, Iparraldera begiratu eta  mugakide eta "lagun" ditugun herrialde batzuek hasi duten bideari ekin:askatasunaren ibilbidea, demokraziaren bidea.